Jeyms Mey The Grand Tourʼdagi eng mashhur avtomobillaridan birini sotmoqda
Avtomobil One for the Road yakuniy maxsus sonida qatnashgan, uning odometri esa koʻrsatkichning toʻgʻriligi tasdiqlanmagan holda 83 368 milni koʻrsatmoqda.
Triumph Stag MkII Collecting Cars platformasida savdoga qoʻyilgan, auksion 29 oktyabrda yakunlanishi kerak. Avtomobil atmosferali 3,0 litrli V8 dvigatel, orqa gʻildirakdan tortish tizimi va toʻrt pogʻonali mexanik uzatmalar qutisi bilan jihozlangan.
U 1974-yil oktabrida roʻyxatdan oʻtkazilgan va qariyb uch yildan beri hozirgi egasiga tegishli. Avtomobil Magenta rangiga boʻyalgan, 14 dyuymli yengil qotishmali disklar hamda Bluetoothʼli Classic Car Stereo audio tizimi bilan jihozlangan.
Avtomobil ikki marta restavratsiyadan oʻtkazilgan, oxirgi restavratsiya dvigatel, uzatmalar qutisi va osma qismlarni ham qamrab olgan. Sotuvchi boʻyoqning umumiy holatini yaxshi deb hisoblaydi, biroq kuzov panellarining ayrimlari tekislanishida muammolar borligini, salonda vaqt taʼsirining izlari koʻrinishini va bezakning ayrim qismlarini almashtirish zarurligini qayd etadi. Soʻnggi qayd etilgan texnik xizmat 2025-yil iyulida, odometr 83 100 milni koʻrsatgan paytda oʻtkazilgan. Sotuvchining soʻzlariga koʻra, restavratsiyaga oid hujjatlar televideniye ishlab chiqarishi vaqtida yoʻqolgan.
