«Talabchan emas»: Jeyms Meyning fikricha, Slate Truck bilan yashash Teslaʼga qaraganda osonroq

Top Gear dasturining sobiq boshlovchisi Jeyms Mey Slate Truckʼni sinovdan oʻtkazib, undan kundalik foydalanish oddiy ekanini aytdi. Uning baholashicha, pikapni boshqarishni tez oʻrganish mumkin: rekuperativ tormozlash yaqqol seziladi, biroq bir pedal bilan boshqarishga tezda koʻniksa boʻladi. Mey yurish ravonligi va salondagi nisbatan past shovqinni ham maqtadi, ammo chap orqa tomondagi katta koʻr zona uchun tanqid bildirdi.

Slate Truck ikki oʻrindiq, bitta elektr dvigatel, orqa yetakchi uzatma va LFP batareyasiga ega. Eʼlon qilingan yurish zaxirasi EPA sikli boʻyicha 205 milni tashkil etadi. Bazaviy jihozlanishda sensorli ekran, standart audio tizimi, murakkab bezak va zamonaviy dasturiy taʼminot yoʻq; konditsioner, kruiz-nazorat va jismoniy boshqaruv elementlari mavjud.

Modelning asosiy oʻziga xos jihati — uni shaxsiylashtirish imkoniyati. Egasi aksessuarlar va kuzov uchun tashqi plyonkalarni oʻrnatishi, shuningdek, maxsus toʻplamlar yordamida pikapni SUV yoki fastbekka qayta jihozlashi mumkin. Bunday yondashuv oddiy avtomobilni xarid qilib, keyinchalik uning tashqi koʻrinishi va jihozlanishini bosqichma-bosqich oʻzgartirish imkonini beradi.