Mercedes qoʻllarsiz haydashga «juda erta» kirishdi, endi ortga chekinmoqda

Mercedes-Benz avtomatlashtirilgan haydash tizimlariga yondashuvini qayta koʻrib chiqdi. Kompaniya yangilangan S-Classʼni Level 3 Drive Pilot tizimi bilan jihozlamadi va endi yanada ilgʻor Level 2++ versiyasini ishlab chiqmoqda.

Drive Pilot 2023-yilda AQSh yoʻllarida foydalanishga maʼqullangan ilk Level 3 tizimiga aylandi. U S-Class va EQS modellari uchun taklif qilingan: belgilangan shartlarga rioya qilinganda, haydovchi qoʻllarini ruldan olishi va yoʻlni kuzatmay qoʻyishi mumkin edi. Biroq tizim taxminan soatiga 40 milgacha boʻlgan tezlikda ishlagan. Shu sababli u odatiy trassadan koʻra, asosan sekin harakatlanadigan oqimda foydali boʻlgan.

Mercedes-Benz texnik direktori Jörg Burzerning aytishicha, kompaniya texnologiyani bozorga juda erta olib chiqdi va haydovchilarga aynan nima kerakligini darhol hisobga olmadi. Endi Mercedes Level 2++ imkoniyatlarini kengaytirmoqda: tizim butun yoʻnalish davomida, jumladan, qator almashtirishda, chorrahalarda, burilishlarda va svetoforlarga javob berishda yordam berishi kerak. Bunda javobgarlik haydovchida qoladi — u yoʻlni kuzatishi va boshqaruvni qoʻlga olishga tayyor boʻlishi lozim.

S-Classʼda bu funksiyalar ishlashi uchun 27 tagacha datchikdan foydalaniladi. Mercedes Level 2++ ni keyingi Level 3 bosqichini chetlab oʻtib, toʻgʻridan-toʻgʻri Level 4 ga oʻtish imkoniga ega boʻlguncha rivojlantirmoqchi. Burzerning fikricha, Level 4 darajasidagi seriyali avtomobil 2030-yildan keyinroq paydo boʻladi. Shundan keyin ham texnologiya, ehtimol, bosqichma-bosqich joriy etiladi, shaharda haydash esa mavjud boʻladigan soʻnggi funksiyalardan biri boʻladi.