Nio rahbari ogohlantirdi: avtomobil vazni 1,2 baravar oshsa, yoʻl zarari 2,07 baravar ortadi

Li bu bayonotni Ujendagi Butunjahon internet konferensiyasining avtomobil forumida, Zhejiang Geely Holding Group raisi Erik Li bilan birga soʻzga chiqqanida berdi. Strategik zaryadlash va batareyalarni almashtirish boʻyicha hamkorlik tuzilganidan keyin bu ularning ilk ommaviy suhbati boʻldi.

U sigʻimi 120 kVt·soatgacha boʻlgan batareyalar va ogʻirligi 700–800 kg boʻlgan batareya bloklariga ega avtomobillarni misol keltirdi. Li aytishicha, bunday ogʻirlik avtomobilning oʻziga uncha katta zarar yetkazmaydi, ammo qoʻshimcha yuk yoʻllarga tushadi. Buning sababi yoʻl muhandisligidagi qoidada: yoʻl qoplamasiga yetadigan zarar oʻq yuklamasining toʻrtinchi darajasiga mutanosib ravishda ortadi.

Nio batareya bloklarining odatiy ogʻirligi 400–500 kg. Li bunday yondashuv kompaniyaning batareya sigʻimi va yurish zaxirasini tanlash imkoniyatini cheklashini tan oldi. «Buning uchun bizga mukofot berisharmikan? Bilmayman», — dedi u.

Reklama

Nio rahbari elektromobillar ogʻirligi masalasini birinchi marta koʻtarayotgani yoʻq. Avvalroq u ishlab chiqaruvchilar batareyalar sigʻimini oʻylamasdan oshirayotganini aytgan, Nioʻning har bir modeli uchun esa maqsadli vazn alohida kelishib olinishini bildirgan. Shuningdek, u avtomobillar ogʻirligini milliy darajada cheklashga chaqirgan, chunki bunday mezonlarsiz raqobat tartibsiz tus olishi mumkin.

Muammo alohida kompaniyalar doirasidan chiqdi: regulyatorlar elektromobillarning energiya sarfiga qoʻyiladigan talablarni ularning jihozlangan holdagi massasi bilan allaqachon bogʻlagan. Shuningdek, soliqlarni hisoblashda avtomobil ogʻirligi ham inobatga olinadigan islohot ehtimoli oʻrganilmoqda.