Tesla endi quvvatlash sohasidagi eng yirik raqiblaridan birini uskunalar bilan taʼminlamoqda

EVgo oʻz tarmogʻidagi Tesla qurilmalari oʻrnatilgan ilk quvvatlash stansiyasini ishga tushirdi. Chikagodagi majmua 12 ta quvvatlash joyiga moʻljallangan boʻlib, AQSh boʻylab yanada kengayishning boshlanishi boʻladi.

Stansiya Magic Dock adapteri yordamida NACS va CCS ulagichlariga ega avtomobillarni quvvatlay oladi. Tesla tijoriy mijozlarga oʻzining V4 quvvatlash shkaflarini xarid qilish va oʻrnatishga ham ruxsat beradi — ular 500 kVtgacha quvvat bera oladi.

EVgoʻning Tesla uskunalari oʻrnatilgan ilk stansiyalari oziq-ovqat doʻkonlari va Regency Centers savdo markazlari yonida paydo boʻladi. Kompaniyalar oʻrtasida allaqachon hamkorlik mavjud boʻlib, uning doirasida EVgo quvvatlash tarmogʻini kengaytirishni rejalashtirgan. Sozlamalarda uchinchi tomon quvvatlash stansiyalarini koʻrsatish opsiyasi yoqilgan boʻlsa, bu quvvatlash joylari Tesla avtomobillari navigatsiyasida aks etadi.

Reklama

EVgo Supercharger tarmogʻini hisobga olmaganda, butun mamlakat boʻylab NACS ulagichlariga ega stansiyalar sonini 500 taga yetkazishni rejalashtirmoqda. Kompaniya ikki yil ichida 2023-yildan keyin qurilgan barcha stansiyalarini kamida bittadan shunday ulagich bilan jihozlamoqchi.

EVgo bosh direktori Badar Xon ishga tushirishni yangi mijozlarni jalb qilish va elektromobillar bozorini NACS standartiga oʻtkazish yoʻlidagi muhim bosqich deb atadi. Kompaniya maʼlumotlariga koʻra, Tesla oʻz quvvatlash qurilmalaridan 99 foiz vaqt davomida foydalanish mumkinligini bildiradi.