Xiaomi oktabrda 50 168 ta avtomobil yetkazdi, Sky Nomad ulushi yarmidan oshdi

Xiaomiʼning avtomobil boʻlinmasi oktabrda 50 168 ta avtomobil yetkazib berdi. Bu kompaniyaning oylik natijasi 50 mingta avtomobildan oshgan ikkinchi holat boʻldi va tarixiy maksimumdan atigi 44 ta avtomobil kam chiqdi. Ulgurji yetkazib berish maʼlumotlarini CPCA eʼlon qildi.

Oʻsishning asosiy manbai Sky Nomad seriyasi boʻldi. Uning ulushi Xiaomiʼning oktabrdagi hajmining 54,11 foizini tashkil etdi — bu ilk bor yarmidan koʻp. Seriya yetkazib berishlari sentabrdagi koʻrsatkichdan ikki barobardan koʻproqqa oshdi. Sky Nomad bozorga sentabrda chiqdi va Xiaomiʼning yurish masofasini uzaytiruvchi qurilma bilan jihozlangan elektromobillarga ega ilk liniyasiga aylandi.

Shu fonda avvalgi batareyali modellarga talab sustroq boʻlib qoldi. SU7 va YU7’ning jami yetkazib berishlari 23 021 ta avtomobilni tashkil etdi, bu avvalgi oyga nisbatan pasayishdir. SU7’da yillik taqqoslashdagi pasayish ketma-ket oʻn uchinchi oy davom etmoqda, YU7 yetkazib berishlari esa ham yillik, ham oylik taqqoslashda qisqarmoqda.

CPCA statistikasida Xiaomiʼning ulgurji va ichki chakana savdolari ham ilk bor bir-biridan farq qildi. Bunga yetkazib berishlar hisobida eksportga kiritilgan 45 ta avtomobil sabab boʻldi. Hisobotda bu mashinalar qaysi mamlakatlarga yuborilgani va qanday maqsadlarda moʻljallangani aniqlashtirilmagan.