Brabus 800: 800 ot kuchi va 100 km/soatgacha 2,4 soniyada
Brabus gibrid qurilmali Porsche 911 Turbo S uchun 800 ot kuchiga ega modifikatsiyani taklif qildi. Kupe 2,4, kabriolet 2,5 soniyada 100 km/soatga chiqadi.
Brabus 800 konversiyasi Porsche 911 Turbo Sʼning kupe va kabriolet kuzovlari uchun taqdim etiladi. Loyiha asosida 3 591 kub santimetrli, olti silindrli gorizontal qarama-qarshi joylashgan dvigatel, gibrid tizim va yangilangan PowerXtra P36-800 mavjud.
Modifikatsiya kuch qurilmasining umumiy quvvatini 588 kVtgacha, yaʼni 800 ot kuchigacha, maksimal burovchi momentini esa 900 Nm gacha oshiradi. Brabus 800 Cabriolet 100 km/soatga 2,5 soniyada, kupe esa 2,4 soniyada chiqadi. Har ikki versiyaning maksimal tezligi elektronika orqali 322 km/soat bilan cheklangan.
Avtomobil zavoddagi faol aerodinamika bilan birgalikda ishlashga moʻljallangan ochiq karbon tolali aerodinamik toʻplam bilan jihozlangan. Unga yon elementlari boʻlgan old spoyler, bamperlarga oʻrnatiladigan qoʻshimchalar, vertikal havo kirish kanallari, karbon kapot, koʻzgular korpuslari va porogʻ qoplamalari kiradi. Detallar uchun yaltiroq va mat qoplamalar taklif etiladi.
Sozlanadigan sport prujinalari kuzovni 25 mm ga pasaytiradi va zavoddagi faol amortizatorlar bilan mos keladi. Oldinda 9,5J x 21 dyuymli, orqada esa 12J x 22 dyuymli disklar oʻrnatilgan; ularga 255/30 ZR 21 va 335/25 ZR 22 oʻlchamdagi Continental SportContact 7 shinalari taqiladi.
Salonda Brabus standart bezakning katta qismini kulrang aksentlarga ega, qoʻlda ishlangan qora charm bilan almashtiradi. Oʻrindiqlar, pol va yukxona gilamchalari Dynamic Diamond Double uslubidagi tikuv bilan bezatilgan. Modifikatsiyalangan avtomobil narxi deyarli 400 000 yevroga baholanmoqda.
