Skoda «xitoycha usulda» ishlaydi va yangi Karoq ishlab chiqilishini tezlashtiradi
Skoda Karoqʼning ikkinchi avlodini uch yildan soʻng bozorga chiqarishni rejalashtirmoqda — bu odatiy sikldan kamida 12 oy tezroq. Loyiha MQB Evo platformasi negizida tezlashtiriladi.
Skoda Karoqʼning ikkinchi avlodini tayyorlamoqda — amaldagi versiya qariyb oʻn yildan beri sotilmoqda va unga talab yuqoriligicha qolmoqda. 2025 yil davomida 102 000 dan ortiq avtomobil sotildi. Shu bilan birga, oʻrta oʻlchamli krossoverlar segmentida Jaecoo 7, Omoda 7 va Chery Tiggo 7 modellari raqobatni kuchaytirdi, Nissan Qashqai va Kia Sportage esa sezilarli yangilanishlardan oʻtdi.
Skoda texnik rivojlanish boʻlimi rahbari Johannes Neft kompaniya yangi modelni uch yildan soʻng bozorga chiqarishga tayyorlashni rejalashtirayotganini maʼlum qildi. Bu standart ishlab chiqish siklidan kamida 12 oy tezroq. Neftning soʻzlariga koʻra, loyiha nafaqat Skoda, balki Volkswagen Group uchun ham eng tezkor loyihalardan biriga aylanadi: kompaniya «xitoycha tezlikda» ishlash niyatida.
Yangi ekologik meʼyorlar atrofidagi noaniqlik sababli modelni chiqarish kechiktirilgan edi. Endi qaror qabul qilindi, ishlarni esa allaqachon mavjud MQB Evo platformasi yordamida tezlashtirish mumkin. Undan amaldagi Kodiaq va Superb, shuningdek, VW Golf, T-Roc va Cupra Formentor modellarida foydalaniladi.
Neftning tushuntirishicha, tayyor texnik baza ishlab chiqish muddatlarini qisqartiradi. Uning soʻzlariga koʻra, bunday yondashuvdan Xitoy avtomobil ishlab chiqaruvchilari faol foydalanadi.
Yangi Karoqʼning asosiy xususiyatlaridan biri gibrid kuch qurilmasi boʻlishi kerak. MQB Evo Golf va T-Roc modellarida ilk bor taqdim etiladigan tizimga oʻxshash toʻliq gibrid tizimdan foydalanish imkonini beradi: uning tarkibiga 1,5 litrli turbomotor va ikkita elektromotor kiradi. Bunday sxema tashqi quvvatlash stansiyasiga ulanmasdan elektr tortish kuchida harakatlanish imkonini beradi.
Skoda Kodiaq va Superbʼdagi kabi qayta quvvatlanadigan gibridni ham taklif qilishi mumkin. Kompaniya Karoqʼning toʻliq elektr versiyasini ishlab chiqarishni rejalashtirmayapti. Yangi model Volkswagen Groupʼda tezlashtirilgan ishlab chiqishning ilk namunalaridan biriga aylanishi va Skodaʼning Xitoy raqobatchilari kuchayishiga javobi boʻlishi kerak.
