Toyota yangi mobillik gʻoyalari uchun Scion by Toyotaʼni taqdim etdi
Toyota Texasda yangi Scion by Toyota brendi va uning nomi ostidagi uchta konseptni taqdim etdi. Loyiha avtomobildan tashqaridagi mobillik gʻoyalarini izlaydi, avvalgi brendni qayta tiklamaydi.
9 noyabr kuni Texasdagi tadbirda Toyota Motor North America yangi brendning uchta konsepti — Side by Side Concept, BKE Concept va KEI-01’ni namoyish etdi. Loyiha mobillikning yangi usullarini izlashga qaratilgan. Toyota Motor Corporation brending boʻyicha direktori Saymon Hamfrisning aytishicha, bu avvalgi Scionʼni qayta ishga tushirish emas.
Toyota original Scion brendini Shimoliy Amerikada 2003 yilda yosh auditoriyaga moʻljallab yoʻlga qoʻygan. Uning qatoridan xA, xB, tC va sport kupesi FR-S oʻrin olgan. Brend, shuningdek, avtomobillarni onlayn sotish va ularni keng koʻlamda shaxsiylashtirish imkoniyatlarini sinab koʻrgan. 2016 yilda Scion Toyota tarkibiga oʻtdi. Brend mavjud boʻlgan davrda 1 mln dan ortiq avtomobil sotilgan, xaridorlarning qariyb 70 foizi esa ilgari Toyota avtomobiliga ega boʻlmagan.
Yangi Scion by Toyota avtomobil mahsuloti doirasidan chiqishi kerak. Hamfris uni Freedom Lab — mobillik gʻoyalari rivojlanib, egalariga moslasha oladigan tajribalar maydoni sifatida taʼrifladi. Uning taʼkidlashicha, brend yoʻnalishi turli hududlarda bir-biridan farq qiladi.
Side by Side Concept loyihani sayohatlar va odatiy yoʻllardan tashqaridagi harakatlanish bilan bogʻlaydi. BKE Concept bu gʻoyani yoʻl tugaydigan vaziyatlarga mos ravishda rivojlantiradi. KEI-01 esa ixcham avtomobil oʻz oʻlchamlaridan kutilganidan koʻra koʻproq imkoniyatlar taqdim eta olishini koʻrsatadi.
Toyota rejasiga koʻra, Scion by Toyota hozircha tajriba bosqichida boʻlgan yechimlar uchun maydonga aylanishi kerak. Kompaniya konseptlarni yangi brendning ilk amaliy qadami sifatida taqdim etdi, biroq ularni seriyali ishlab chiqarish muddatlari, texnik xususiyatlari va narxlarini oshkor qilmadi.
