Mercedes-Benz EQE, EQE SUV va EQS SUV ishlab chiqarishini toʻxtatishga hozirlanmoqda
Mercedes-Benz EQE, EQE SUV va EQS SUV onlayn konfiguratorlarini xususiy mijozlar uchun oʻchirib qoʻydi. Bu modellar ishlab chiqarilishi tez orada yakunlanishidan darak boʻlishi mumkin.
Kompaniya ishlab chiqarishni toʻxtatishning aniq sanasini maʼlum qilmadi. EQE sedani hamda EQE SUV va EQS SUV krossoverlari EVA, MEA va EVA II nomlari bilan tanilgan yagona elektromobil platformasida yaratilgan. Yangilangan 800 voltli arxitekturaga ega boʻlgan flagman EQSʼdan farqli ravishda, bu modellar platformaning yangilangan versiyasini olmagan.
EQE Mercedes-Benzʼning Bremen shahridagi va Beijing Benzʼning Pekindagi zavodlarida ishlab chiqariladi. EQE SUV Tuskalusa va Pekinda, EQS SUV esa AQShning Tuskalusadagi korxonasida ishlab chiqariladi. 2023 yilda Amerikadagi sust savdolar fonida muhokama qilingan EQS SUV ishlab chiqarishini AQShdan Germaniyaga koʻchirish amalga oshmadi.
Mustaqil maʼlumotlar talab keskin kamayganini koʻrsatmoqda. AQShda 2026 yilning dastlabki uch choragida 126 ta Mercedes-Benz EQE sotildi — bu bir yil avvalgi shu davrga nisbatan 94,6 foizga kam. EQE SUV savdosi 1122 ta avtomobilni tashkil etdi (-80,9%), EQS SUV esa 626 ta sotildi (-77,9%). Xitoyda faqat mahalliy yigʻuv hisobga olingan: u yerda 191 ta EQE (-82,8%) va 806 ta EQE SUV (-63,1%) sotilgan.
Muvaffaqiyatsizlik sabablari qatorida baliqqa oʻxshash dizayn, sensorli ergonomikaga ega bir xil salonlar va yuqori narxlar tilga olinadi. Mercedes-Benz elektr versiyalarini EQ Technology qoʻshimchasi bilan belgilashdan ham voz kechdi: endi electric soʻzi ishlatiladi.
