Yangilangan Mercedes-Benz GLC Xitoyda paydo boʻldi

Yangilangan Mercedes-Benz GLC sotuvi Xitoyda boshlandi. Model avvalgi tashqi koʻrinishi va dvigatellarini saqlab qoldi, biroq jihozlanish darajalari qayta koʻrib chiqilib, uskunalar toʻplami oʻzgartirildi va narxlar pasaytirildi.

Bazaviy versiyada panoramali koʻrish kameralari olib tashlandi, toʻrt zonali iqlim nazorati esa ikki zonaliga almashtirildi. Ikkinchi komplektatsiyada ilgʻor navigatsiya endi mavjud emas, biroq adaptiv kruiz-kontrol saqlanib qoldi. Eng qimmat ikki versiyada yon zinapoyalar, yoʻlovchi tomonidagi boshqaruv tugmalari, kutib olish yoritgichi hamda kengaytirilgan reallik funksiyasiga ega navigatsiyadan voz kechildi.

Shu bilan birga, krossover uchun old oʻrindiqlarni shamollatish, orqa oʻrindiqlar va rulni isitish, shuningdek, salonni xushboʻylantirish funksiyasi ham mavjud boʻldi. Mercedes-Benz GLC faqat besh oʻrinli versiyada ishlab chiqariladi.

Barcha versiyalarda hajmi 2,0 litr boʻlgan, maksimal quvvati 204 yoki 258 ot kuchiga teng turbomotor ishlatiladi. U 9 pogʻonali avtomatik uzatmalar qutisi va toʻliq yuritma bilan birga ishlaydi. Salonda raqamli asboblar paneli va vertikal markaziy ekran oʻrnatilgan, bazaviydan yuqori komplektatsiyalarda esa premium sinfidagi hajmli ovoz tizimi mavjud. Yuqori darajadagi versiyalarda proyeksiya displeyi va salonning koʻp rangli yoritilishi ham taklif etiladi.