Volkswagenning yangi elektr yoʻltanlamasi ID.4 toʻxtagan joydan estafetani davom ettiradi
Volkswagen Germaniyada elektr quvvatli ID. Tiguan modelini seriyali ishlab chiqarishni boshladi. Model Yevropada taqdim etilgach, 2027 yilda brend qatorida ID.4 va ID.5 oʻrnini egallaydi, keyin esa Shimoliy Amerikada ID.4 oʻrniga chiqadi.
ID. Tiguanʼni yigʻish Volkswagenning Emden shahridagi zavodida boshlandi. Elektr SUV ID.4 va ID.5’ning vorisi boʻladi, kompaniyaning oʻzi esa raqamli nomlashdan voz kechib, brendning eng koʻp sotiladigan avtomobillaridan biri — Tiguan nomiga oʻtmoqda.
Yangi model SUVlar uchun anʼanaviyroq boʻlgan kuzovga, keng old qismga va odatiy eshik tutqichlariga ega. Salonida 10 dyuymli Digital Cockpit paneli va diagonali 15 dyuymli markaziy ekran oʻrnatilgan; qoʻshimcha haq evaziga yoʻlovchi uchun 12 dyuymli displey ham taklif etiladi. Volkswagen markaziy ekran ostida va rulda iqlim hamda boshqa funksiyalarni boshqarish uchun jismoniy tugmalarni qaytardi.
ID. Tiguan uchun ekranlar koʻrinishini Volkswagenning klassik modellari uslubida oʻzgartiradigan Retro Mode rejimi koʻzda tutilgan. Virtual garajda Golf I, Golf II Country, Golf IV, Tiguan I, Race Touareg yoki Beetle modellaridan birini tanlash mumkin.
Xaridorlarga kuch qurilmasining uchta varianti taklif etiladi: 58 kVt·soat sigʻimli batareyaga ega, quvvati 140 kVt (190 ot kuchi) boʻlgan orqa gʻildirakdan tortuvchi avtomobil; 77 kVt·soat sigʻimli batareyaga ega, quvvati 210 kVt (286 ot kuchi) boʻlgan orqa gʻildirakdan tortuvchi versiya; shuningdek, xuddi shu sigʻimdagi akkumulyator bilan jihozlangan, quvvati 220 kVt (299 ot kuchi) boʻlgan toʻliq yuritmali 4MOTION varianti. WLTP sikli boʻyicha yurish zaxirasi 607 kilometrgacha yetadi.
Germaniya va Yevropaning ayrim boshqa mamlakatlarida buyurtmalar oktabr oyida ochildi. Narx 47 200 dollardan boshlanadi, Trend, Life va Style komplektatsiyalari mavjud. 2027 yil boshigacha davom etadigan Yevropadagi taqdimotdan soʻng Volkswagen ID. Tiguanʼni Shimoliy Amerika bozoriga ID.4 oʻrniga olib chiqishni rejalashtirmoqda. Kompaniya AQSh uchun narxlarni hozircha eʼlon qilmadi.
