Honda 2028 yilgacha yangiliklarni eʼlon qildi: CR-V tubdan yangilanadi, eski krossover qaytadi

Honda dilerlarga model qatorini yangilash rejalarini ochiqladi, biroq uchrashuv haqida alohida rasmiy press-reliz chiqarmadi. Eʼlon qilingan yangiliklar qatorida ixcham Element krossoverining qaytishi va CR-Vʼning keng koʻlamda modernizatsiya qilinishi bor.

Yangi Element burchakli kuzovini saqlab qoladi va teskari ochiladigan orqa eshiklarga ega boʻladi. Model CR-Vʼdan bir pogʻona pastda joylashadi hamda yosh haydovchilar va shaharda foydalanish uchun krossoverga muhtoj boʻlganlar uchun moʻljallanadi. U uchun opsional toʻliq yuritma taklif qilinadi. Taqdimot yaqin ikki yil ichida kutilmoqda, seriyali ishlab chiqarish esa 2029 yildan oldin boshlanmaydi. Honda birinchi yilda kamida 100 000 ta avtomobil ishlab chiqarishni rejalashtirmoqda.

Yettinchi avlod CR-V yangi kuzovga va, ehtimol, butunlay qayta ishlangan salonga ega boʻladi. Krossover boshqa platformaga oʻtkazilib, ikki elektr dvigateli va toʻliq yuritmali gibrid kuch qurilmasi bilan jihozlanadi. Tizimning aniq xususiyatlari hozircha oshkor etilmagan. Honda yoqilgʻi sarfini hozirgi CR-V bilan taqqoslaganda 10 foizga kamaytirishni koʻzlamoqda. Model premyerasi kelasi yilga rejalashtirilgan.

Keyinroq kompaniya Ridgeline pikapini yangilaydi. Uchrashuvda radiator panjarasi oʻzgartirilgan, tomida yorugʻlik balkasi va firma relinglar tizimi boʻlgan konsepti namoyish etildi. Honda Pilot va Accord yangilanishlarini ham eʼlon qildi: krossover tashqi koʻrinishining tubdan qayta ishlanishidan oʻtadi, sedan esa kichik feyslifting oladi. Ularning premyera muddatlari hozircha aytilmagan. Avvalroq mish-mishlar tarqalgan yangi uch qatorli krossover haqida kompaniya maʼlumot bermadi.