BYD Seal 07 130 km/soat tezlikdagi sinovda toʻqnashuvdan qochdi
BYD Seal 07 sedanida Godʼs Eye tizimini yoʻlning uch xil ssenariysida sinovdan oʻtkazdi. Ulardan birida avtomobil 130 km/soat tezlikda toʻsiqni mustaqil ravishda aylanib oʻtdi.
BYD avtomobilning toʻsatdan paydo boʻlgan toʻsiqlarga reaksiyasini tekshirish uchun Seal 07 modelini Godʼs Eye haydovchiga yordam berish tizimi bilan sinovdan oʻtkazdi. 130 km/soat tezlikda oldinda ketayotgan krossover yoʻnalishini oʻzgartirgach, sedan avtomobil maketini aniqladi, haydovchini ogohlantirdi va rulni mustaqil burib, favqulodda manyovrni amalga oshirdi. Toʻqnashuvning oldi olindi, shundan keyin avariya chiroqlari yoqildi. Videoga qarab, avtomobil oʻz qatoriga qaytgan-qaytmaganini aniqlab boʻlmaydi.
Boshqa bir ssenariyda Seal 07 Sealion 05 krossoveri va yuk mashinasi oʻrtasida harakatlandi. Krossover yoʻnalishini oʻzgartirgach, sedan 90 km/soat tezlikda qatorini ham almashtirdi. Bunday vaziyatda keskin tormozlash orqadan kelayotgan yuk mashinasi bilan toʻqnashuvga olib kelishi mumkin edi. Uchinchi sinovda avtomobil xuddi shu tezlikda toʻxtab turgan mashina ortidan chiqqan bola manekenini aniqladi va uni aylanib oʻtdi.
Godʼs Eye B tizimida tomga oʻrnatilgan lidar, kameralar, ultratovush datchiklari va millimetr diapazonidagi radarlar ishlatiladi. Ularning maʼlumotlarini eng yuqori unumdorligi 254 TOPS boʻlgan Nvidia Drive Orin X chipi qayta ishlaydi. Majmua avtomatik toʻxtash joyiga qoʻyish, favqulodda tormozlash va rul boshqaruvi, shuningdek, Navigate On Autopilot funksiyalarini qoʻllab-quvvatlaydi; bunda haydovchi harakatni kuzatib borishi kerak.
Seal 07 toʻliq elektr versiyada, shuningdek, tarmoqqa ulanadigan gibridli DM-i variantida ishlab chiqariladi. Xitoy bozorida EV versiyasining narxi 22 500–25 800 dollarni, gibrid versiyaniki esa 21 000–22 500 dollarni tashkil etadi. BYD Godʼs Eye tizimini xalqaro bozorlarga olib chiqmoqchi.
